Kolektivi për Mendim dhe Veprim Feminist dje mbajti diskutimin e hapur me Lirika Demirin mbi seksualizimin femëror.
Pëmes shqyrtimit të librit të Frigga Hugh, Female Sexualization: A Collective Work of Memory, të pranishmit diskutuan mbi seksualizimin e trupave të grave përmes kritikës strukturaliste, njohjes dhe historicizimit të përvojave personale të trupave të seksualizuar të grave.
Në vitet e 1980-ta, në Berlinin Perëndimor, studente të shkencave sociale, ligjëruese në fusha të ndryshme, e aktiviste në lëvizje për barazi shoqërore, bëhen bashkë dhe gjurmojnë në kujtimet e tyre të lidhura me trupin. Duke e quajtur këtë metodë reflektuese “memory-work” ato synojnë të kuptojnë se si kujtesa për trupin, e diskutuar kolektivisht, mund të përdoret si kritikë kundrejt strukturave socializuese kufizuese. Përmes rrëfimeve të tyre për flokët, këmbët, gojën, qëndrimin e trupit, orët e gjimnastikës, e orët e punës, ato mundohen t’i ikin gjuhës së klisheizuar për trupin, dhe t’i shërbejnë përafrimit të përvojës personale me mendimin teorik, me qëllim zhbërjen e praktikave seksualizuese të trupit të grave.
