Diskutimi “Epistemologjia dhe Gratë: Perspektiva gjinore në akademi” vjen në kuadër të aktiviteteve të Kolektivit që synojnë shqyrtimin e konstrukteve problematike në terma gjinor. Në këtë linjë, nga perspektiva e një epistemologjie feministe, Kolektivi bashkë me folëset problematizoi ngjyrimin faktik gjinor të dijes që historikisht i ka lënë gratë në pozitë dytësore në prodhimin formal të dijeve. Përmes shqyrtimit teorik dhe përvojës në akademi, diskutimi synoi të reflektojë mbi konceptet dominante dhe dijen e institucionalizuar që karshi potencialit emancipues shërbejnë edhe si formë dominimi dhe shndërrohen rrjedhimisht në mjete për nënshtrim gjinor.
Për të diskutuar mbi gjinizimin faktik të dijes nga aspekti teorik dhe mbi situatën aktuale gjinore në akademi, me fokus kontekstin kosovar, të ftuara ishin:
Prof. Ass. Dr. Vjollca Krasniqi, ligjëruese në Universitetin e Prishtinës “Hasan Prishtina” dhe aktiviste feministe
Prof. assoc. Dr. Merita Koçinaj –Berisha, prorektore në Universitetin e Prishtinës “Hasan Prishtina”.
Përmes shqyrtimit të historisë së mendimit, ndërtimit të epistemologjisë dhe institucionalizimit të dijes, të pranishmit diskutuan mbi raportin dije –pushtet nga prizmi gjinor. Me fokus tek situata gjinore në akademinë në Kosovë, pjesëmarrësit shtruan kritikat feministe që problematizuan seksizmin në akademi dhe diskutuan mbi alternativat feministe që angazhohen në njohjen dhe përfshirjen sa më të drejtë të grave si subjekt në dije dhe shkencë.
