Në oborrin e Fakultetit Filozofik, diskutuam mbi librin “Gratë, raca dhe klasa” (1981) të Angela Davis, teoriciente dhe aktiviste politike.
Angela Davis, aktiviste politike radikale dhe shkollare, në këtë vepër paraqet një shqyrtim historik të lëvizjeve të grave, nga përpjekjet për çrrënjosje të skllavërisë e deri tek e drejta për të votuar. Duke shqyrtuar ndërlidhjen e këtyre lëvizjeve, Davis nxjerr në pah racizmin dhe pabarazitë klasore që kanë shoqëruar ato.
Në lëvizjen për të drejtën e grave për të votuar në SHBA, gratë e zeza ishin te padukshme pasi që ato përveç të të qenurit gra, ishin edhe të zeza, gjë qe ua pamundësonte të drejtën e votës. Ndërsa gratë e klasës punëtore, nuk mundën kurrë ta përqafojnë kauzën për të drejtën e votës. Problemet imediate si rrogat e ulëta, orët e stërzgjatura dhe kushtet e punës qenë preokupim kryesor i tyre. Sipas Angela Davis, udhëheqëset e lëvizjes për të drejtat e grave kurrë nuk arritën të kuptojnë se si skllavërimi i zezakëve, eksploatimi kapitalist i punëtoreve/ëve dhe shtypja e grave ishin të ndërlidhura në mënyrë sistemike.
Libri mund të gjendet në linkun: Angela Davis – Women Race and Class (1981)
