Në javën e tretë të tetorit, Kolektivi diskutoi “Seksin e Dytë” të Simone de Beauvoir, filozofe, feministe dhe aktiviste e shquar e shekullit XX, pikëpamjet radikale e së cilës trasuan rrugën për lindjen e valës së dytë të feminizmit.
Teza kryesore e “Seksit të dytë” thotë se burrat i shtypin fundamentalisht gratë duke i lënë ato në një pozitë dytësore dhe të shtypur. Burri okupon rolin e vetes apo subjektit, gruaja është objekti, Tjetra. Ai është esencial, absolut dhe transcendent, ajo është joesenciale, e pakompletuar dhe e gjymtuar. Sipas De Beauvoir, teksa burri imponon vullnetin e tij në botë, gruaja është e dënuar me imanencë dhe përmbushje të “feminitetit të përhershëm”.
Përgjatë dy vëllimeve të veprës: ‘Fakte dhe Mite” dhe “Përvoja e jetuar”, De Beauvoir e trajton pozitën e nënshtruar duke i shqyrtuar disa nga diciplinat kyce si: biologjia, psikoanaliza dhe materializmi historik dijet e së cilave kanë prodhuar spekulime që i kanë shtypur gratë. Gjithashtu, përmes përshkrimit të jetës në “përvojën e jetuar”, ajo identifikon shkaqet e shtypjes së grave dhe demaskimin e mijëra kufizimeve që e rrethojnë gruan dhe e zhveshin atë nga aftësia për të arritur lirinë.
Filozofia feministe e de Beauvoir, e ndërtuar mbi frymën eksiztencialiste e sheh “feminitetin” e grave si krijesë shoqërore. Sipas saj, gratë nuk janë për nga natyra gjini inferiore por është procesi socializues që i bënë të tilla, duke deklaruar që “nuk lindesh grua por bëhesh e tillë”.
Diskutimi u mbajtë në bibliotekën Kombëtare të Kosovës.
Librin në gjuhën angleze e gjeni të bashkangjitur në linkun e mëposhtëm: