Me 15 nëntor 2019, Kolektivi mbajti diskutimin me Vjollca Krasniqin, Nerina Gurin dhe Mirishahe Sylën mbi: Organizimin gjinor të punës dhe kufijtë e neoliberalizmit.
Diskutimi u fokusua tek puna e gjinizuar dhe pasojat që ka prodhuar në pjesëmarrjen gjinore në punë dhe pozitën shoqërore të gjinive brenda privates dhe publikes. Përmes dekonstruktimit të ekonomizimit të punës, u shqyrtua shtypja sistematike e grave përmes krijimit të dikotomisë private-publike dhe reduktimin e privates në duart e grave e cila në kapitalizëm mbetet e papaguar.
Përmes parashtrimit të pozicioneve feministe karshi punës, u shqyrtuan kritikat rreth organizimit të saj dhe tentativat neoliberale si përgjigje për avancimin e barazisë gjinore dhe drejtsisë gjinore. Duke i konsideruar teoritë e ekonomisë feministe, feminizmit marksist, socialist dhe atë të ndërthurjes, folëset treguan për kufizimet e neoliberalizmit që shihet si një qasje e dëmshme për idealet feministe. Dështimi i neoliberalizmit për njohjen e strukturave socio-ekonomike që në thelb janë të padrejta, të pabarabrta dhe të ndërtuara mbi parimet e meritokracisë, konkurrencës dhe neutralitetit të pretenduar e pamundësojnë arritjen e barazisë gjinore dhe drejtësisë shoqërore në kushtet neoliberale duke e shndërruar konceptin e barazisë gjinore në mjet për mirëmbajtjen e këtyre strukturave të pabarabarta. Gjithashtu kritikat feministe, sipas folësve, e hedhin poshtë mundësinë e ekzistencës së tregut të lirë mbi të cilën operon ideologjia neoliberale, duke e sfiduar konceptin e “zgjedhjes së lirë dhe racionale” në një sistem kapitalist që rezulton shtypës për grupe të caktuara identitare që si pasojë e strukturave gjenden në pozita të paprivilegjuara dhe nuk përfitojnë nga masat “afirmative” neoliberale.
Duke e konsideruar përvojën e Kosovës, u theksua nevoja për rimendimin e feminizmit(ave) në Kosovë dhe ridefinimin e formave të luftimit të patriarkalizmit dhe produkteve të saj në mënyrë që të arrihet barazia gjinore dhe drejtësia shoqërore. Kjo, sipas panelisteve, është e mundur kur aplikohet njohja dhe rishpërndarja si mjete për garantimin e një avancimi gjinor më përmbajtësor në të cilat insiston Nancy Fraser. Një feminizëm ndërthurës dhe një feminizëm për 99% u prezantuan si alternativa për çlirim nga intervenimet neoliberale dhe arritjen e revolucionit gjinor dhe klasor.
