VRASJET E GRAVE TË TRAJTOHEN SI URGJENCË KOMBËTARE!
Sot, marshuam nga Ministria e Drejtësisë për tek Ministria e Punëve të Brendshme e në fund tek Qeveria, ku hodhëm edhe ngjyrë të kuqe, si revoltë kolektive ndaj vrasjes së grave e indiferencës institucionale. Vrasja e fundit, sikundër të gjitha rastet e femicidit në Kosovë, të shkaktuara nga burrat, është bërë me ndërmjetësimin e shtetit. Prandaj kjo protestë, përveç kundërshtimit e mllefit tonë, ishte për t’i dhënë alarmin e fundit Qeverisë që ta kthejë vëmendjen tek femicidi dhe t’i trajtojë vrasjet e grave si urgjencë kombëtare.
Protesta e revolta jonë e përbashkët vazhdon të jetë kundër të gjitha këtyre institucioneve të cilat me praktikat e tyre janë duke i dhunuar vazhdimisht, për t’ua marrë edhe jetën në fund. Kjo për të treguar edhe një herë se përderisa ky shtet vazhdon avazin e indiferencës, mos-ndëshkimit të dhunës ndaj grave e femicidit, ne do rezistojmë. Do të rezistojmë e kundërvihemi çdo autoriteti e pushteti që punon e funksionon kundër nesh. E kjo rezistencë nuk mundet e as nuk do të jetë e heshtur e paqësore. Përderisa gratë vriten e dhunohen, ne as nuk mundemi e as nuk duam të jemi të qeta e paqësore e të bëjmë kompromis me jetën e mbi trupat e tanë.
